ភ្នំពេញ: រកឃើញហើយ បេក្ខភាពទី៩ របស់គណៈកម្មាធិការជាតិរៀបចំការបោះឆ្នោត(គ.ជ.ប.) ដែលគណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀងគ្នា ដើម្បីបោះឆ្នោតជ្រើសតាំងជាសមាជិកគ.ជ.ប.។ នោះគឺគ្មាននរណា ក្រៅពីលោកស្រី ពុង ឈីវហ្កេក ប្រធានអង្គការសិទ្ធិមនុស្ស លីកាដូ នោះឡើយ។ ប៉ុន្តែដំណឹងផ្លូវការ នឹងត្រូវលោកស្រី ពុង ឈីវហ្កេក ប្រកាសនៅព្រឹកថ្ងៃទី២៩កក្កដា។
បន្ទាប់ពីចូលរួមកិច្ចប្រជុំវិសាមញ្ញ រដ្ឋសភា នាព្រឹកថ្ងៃទី២៨កក្កដានេះ នៅវិមានរដ្ឋសភា សម្តេចហ៊ុនសែន និងលោកសមរង្ស៊ី បានថ្លែងទៅកាន់ក្រុមអ្នកកាសែតថា បេក្ខភាពគ.ជ.ប. ទី៩ គឺគណបក្សទាំងពីរ បានព្រមព្រៀងហើយ តែមិនទាន់ប្រកាសជាសាធារណៈនៅឡើយទេ ដោយរង់ចាំសាម៉ីខ្លួន ឆ្លើយតបជាផ្លូវការសិន។
ប៉ុន្មាននាទីក្រោយមក លោកស្រី ពុង ឈីវហ្កេក បានឲ្យដឹងថា លោកស្រី កំពុងតែរៀបចំលិខិតឆ្លើយតបទៅកាន់ប្រមុខដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ នៅថ្ងៃទី២៨កក្កដានេះ។ នៅម៉ោង ១១ ព្រឹក ថ្ងៃទី២៨កក្កដានេះ លោកស្រី ក៏បានកោះប្រជុំសមាជិកថ្នាក់ដឹកនាំអង្គការលីកាដូ របស់លោកស្រីផងដែរ។
យ៉ាងណាក៏ដោយ លោកស្រីបានអះអាងថា ដំណឹងផ្លូវការ នៃការទទួលយកបេក្ខភាពរបស់លោកស្រី ជាសមាជិកទី៩ របស់គ.ជ.ប. នឹងត្រូវលោកស្រី ប្រកាសជាផ្លូវការ នៅព្រឹកថ្ងៃទី២៩កក្កដា។
ជាការកត់សម្គាល់ លោកស្រី ពុង ឈីវហ្កេក និងក្រុមគ្រួសារ ធ្លាប់បានចូលរួមក្នុងការរៀបចំកិច្ចចរចា ឈានទៅចុះកិច្ចព្រមព្រៀងសន្តិភាពទីក្រុងប៉ារីស ថ្ងៃ២៣តុលា ឆ្នាំ១៩៩១៕
Source: CEN
